Inhalt

Plattdüütsch in Oostholsteen

De plattdüütsch Spraak hett as ’n lebennig Spraak in de verleden Johr’n weller ’n düchtigen Stellenweert in dat gesellschaapsche Leven vun Noorddüütschland kregen. In Kinnergoorns un Scholen, bi Leeswettstrieden or Theateropföhren speelt de plattdüütsch Spraak en tonehmend gröttere Rull.

Ok de Kreis Oostholsteen hett sik dat Plattdüütsche lieksam ’n beten op de Fahn schreven un müch düsse Spraak ünnerstütten un lebennig hol’n. So hett to’n Bispill de oostholsteensch Kreisdag  an'n 23.03.2007 beslaten, eenmal in’t Johr sien Kreisdagssitten ok mit ’n plattdüütsch Stünn aftoholen. He höllt Plattdüütsch för ’n wichtigen Deel vun uns Heimat un Levensoort.

Den akkeraten Woortluut vun de Beslussvörlaag köönt Se hier nakieken.

Jüst dorüm laadt wi Se vun Harten in, sik op uns Sieden in de plattdüütsch Spraak över den Kreis Oostholsteen kunnig to maken. Düss Anbott warrt wi na un na utbuen. Nich toletzt finnt de Besökerschen un Besökers an vele Dören vun’e Amtsstuven in’t Kreishuus en Schild mit de Opschrift:

Ik snack ok Platt,

will heten, een kann sik hier ok geern in Plattdüütsch an’e Kolleegsche or an den Kollegen wennen.

Plattdüütsch Aktivitäten in Oostholsteen

Autoren

De en or anner plattdüütsch Schrieversche un Schriever leevt hier in‘n Kreis un maakt Lesen un höllt Vördreeg.

Karken

Dat gifft in männicheen Kark vun’n Kreis ok Plattdüütsch Gottsdeensten, so to’n Bispill in Bosau, Landkirchen/Fehmarn, Neustadt in Holstein, Oldenburg in Holstein, Heiligenhafen, Schönwalde, Grömitz un Süsel.

Kinnergoorns

In männicheen Kinnergoorn warrt ok Plattdüütsch anbaden.

Kreismusikschool

De Kreismusikschool hett dat Plattdüütsche in ehr mehrspraakschen Gesangs- un Chorstunnen as ok in de Konzerten mit opnahmen.

Musikgruppen

Jümmers mehr Musikgruppen ut’n Kreis Oostholsteen pleegt ok de plattdüütsch Spraak. So to’n Bispill de Musikgruppen:  „Timmerhorst“ (Haffkrug), „Handgemacht“ (Neustadt in Holstein), „Gnisse(e)bären“(Gnissau) un  „Ostholsteiner Knallkoem“ (Dissau).

Plattdüütschbeopdragte

De Kreis Oostholsteen hett mit Wirken vun’n 1. Januarmaand 2014 en Plattdüütsch-beopdragten bestallt. He versöcht bi all Fragen to Plattdüütsch in’n Kreis to hölpen.

Plattdüütsch Wöörbook

Op de Homepage vun den Plattdüütschbeopdragten (www.heinrich-evers.de) is dat plattdüütsche Wöörbook „Platt för Plietsche“ för jeedeen ahn Kosten to nütten.

Scholen

mit de Grundscholen vun Landkirchen/Fehmarn un Grube höört twee Scholen ut’n Kreis Oostholsteen mit to den lanneswieden Modellversöök „Plattdüütsch in’e School“. Dat gifft in poor Scholen Plattdüütsch Arbeitsgemeenschapen, so to’n Bispill in Burg/Fehmarn, Lensahn, Grömitz un Neustadt in Holstein. Leider blots heel wenig Scholen (to’n Bispill Landkirchen/Fehmarn, Grömitz, Grube un Süsel) maakt mit bi den Plattdüütschen Leeswettstriet, de all twee Johren dörchföhrt warrt.

Sporkass Holsteen

De Sporkass Holsteen föddert de plattdüütsch Saak dörch Unnerstütten över de „Stiftungen der Sparkasse Holstein“ vun de Seminaren „Mit twee Spraken rin in’t Leven - Plattdüütsch in Kinnergoorns vun Oostholsteen“, de vun den Plattdüütschbeopdragten organiseert warrt. Se unnerstütt un föddert ok dat Plattdüütsche bi de Leeswettstrieden an de Scholen.

Theater/ Nedderdüütsch Speeldeelen

Dat gifft en Reeg vun Amateurtheaters as to’n Bispill, De NDB Süsel, De fidelen Grünbeker, De Grover Speeldeel, De Lenter Gill, De Lustigen Wagrier, De Ollenborger Dwarslöper, De Schürsdörper Speeldeel, de Warder Speeldeel as ok vele Speelgruppen vun‘e Füerwehren in’n Kreis.

Verenen, Krinks un Institutschonen

För Lüüd, de geern mal Plattdüütsch snacken wüllt, gifft dat ’n Barg vun Krinks in’n Kreis Oostholsteen, to’n Bispill:

»Lenter Gill« 

»Plattdüütsch bi uns« im Gemeinnützigen Bürgerverein von 1950 e. V. Bad Schwartau

“Plattdüütsch Runn“ vun de VHS Fehmarn

„Plattsnacker Grotenbrood“

„Plattdüütsch Krink vun’n Heimat- und Kulturverein Grube"

„Plattdüütsch Runn vun 1996“ Heiligenhafen

„Plattdüütsch Runn in Kellenhusen“

„Freunde der plattdeutschen Sprache“ Neustadt in Holstein

»Neue Pansdorfer Plattsnacker«

»Plattdüütsch Krink to Ratekau« 

»Sereetzer Plattsnacker«

Volkshoochscholen

Plattdüütsch Ünnerricht  gifft dat an de Volkshoochscholen vun Neustadt in Holstein, Fehmarn, Klingberg am See un Lensahn.